Saa 48 zilivyoacha machungu ya petroli na dizeli kila kona

Dar/mikoani. Baadhi ya vituo vya mafuta vimefunguliwa na vingine kuendelea kufungwa katika maeneo ya jiji la Dar es Salaam na mikoa mbalimbali kutokana na sakata la mashine za kieletroniki za stakabadhi zilizounganishwa na pampu (electronic fuel fiscal printer).

Mamlaka ya Mapato Tanzania (TRA), juzi ilivifungia vituo vya mafuta kote nchini vilivyoshindwa kufunga mashine hizo za kutolea stakabadhi.

Jana, baadhi ya vituo vilionyesha ushirikiano kwa TRA kwa kufanya utaratibu wa kununua mashine hizo na vikaanza kufanya kazi kama kawaida.

Kati ya vituo vya mafuta 71 vilivyofungwa jijini Dar es Salaam, 52 vilitoa ushirikiano kwa mamlaka hiyo na vilitarajiwa kufunguliwa muda wowote ili kuendelea na huduma.

Waandishi wa gazeti hili walizunguka katika vituo mbalimbali vya kuuzia mafuta jijini Dar es Salaam na kukuta misururu ya magari ikiwa imepungua ikilinganishwa na hali ilivyokuwa juzi.

Hata hivyo, katika baadhi ya mikoa hali ilionekana kuendelea kuwa ngumu.

Mkurugenzi wa Huduma na Elimu kwa Mlipakodi, Richard Kayombo alisema kazi ya kuvifungia vituo hivyo itaendelea nchi nzima hadi pale agizo la utumiaji wa mashine hizo litakapotekelezwa.

Kwa Wilaya ya Kinondoni vituo 28 vimefungwa, Ilala vituo 31 na Temeke vituo 12.

Hata hivyo, Kayombo alisema TRA imeanza kuvifungulia vituo vilivyofungwa pindi vinapotimiza masharti na kufuata taratibu za kuwa na mashine hizo kama inavyoelekezwa kwa mujibu wa sheria.

Alisema si lengo la TRA kuwaumiza wananchi au kuwasumbua wafanyabiashara bali ni utekelezaji wa sheria na taratibu zilizowekwa na kupitishwa na Bunge.

“Tunaomba wananchi wawe wavumilivu katika kipindi hiki ambacho tunataka sheria na taratibu zifuatwe kwa wafanyabiashara kutumia risiti hizo kama ilivyoanishwa kisheria na kutangazwa bungeni,”

“Wanaotimiza masharti watafunguliwa haraka iwezekanavyo ili waendelee kutoa huduma na kuwaondolea wananchi usumbufu usiokuwa na msingi,” alisema.

Pia, Kayombo aliwataka wafanyabiashara kutoa ushirikiano kwa kutafuta mashine hizo kwa kuwa ndiyo utaratibu unaotakiwa kufuatwa.

Kuhusu gharama za mashine hizo kuwa juu, Kayombo alisema si kweli na wafanyabiashara walipewa muda mrefu kwa ajili ya kujiandaa, lakini hadi sasa bado wapo ambao wanataka kuendelea kufanya biashara bila kutoa risiti halali.

“Kuna wasambazaji watano wa mashine hizo, unaweza kumchagua yeyote ambaye utaona gharama zake zina nafuu kwetu jambo la muhimu uwe na mashine hiyo,” alisema.

Julai 13, TRA ilianza kufungia vituo ambavyo havijaweka mashine za stakabadhi zilizounganishwa na pampu (electronic fuel fiscal printer).

Hatua hiyo ilianza siku moja baada ya Waziri wa Fedha na Mipango, Dk Philip Mpango kuzuru katika kituo kimoja cha mafuta kilichopo eneo la uwanja wa ndege na kukuta huduma zinatolewa bila risiti, hivyo akaamuru kifungwe.

Dk Mpango alisema kufanya biashara bila risiti za EFD ni wazi wafanyabiashara wana lengo la kuiibia Serikali.

Wanunua mafuta Kenya

Wilayani Tarime, TRA imeendelea kufunga vituo vya mafuta, hali ambayo imesababisha usumbufu kwa watumiaji ambao wamelazimika kutembea umbali wa kilomita 18 kwenda wilaya jirani ya Sirari au kuvuka mpaka kwenda nchini Kenya kupata huduma hiyo.

Wakizungumza na gazeti hili, watumiaji hao wamesema pamoja na kusafiri umbali huo, huduma hiyo imeadimika katika maeneo hayo hali inayosababisha wanaouza rejareja kupandisha bei kutoka Sh2,500 hadi Sh3,000 kwa lita.

Hali kadhalika usafiri wa bodaboda nao umepanda bei kutoka Sh1,000 kwa bei ya kawaida na kufikia Sh2,000 au zaidi ya hapo ikitegemea na umbali.

Mkazi wa Mtaa wa Rebu Senta wilayani Tarime alisema gharama hizo zilipanda saa chache baada ya TRA kufungia vituo vingi vya mafuta.

Mabadiliko ya bei hizo yamekuja baada ya vituo saba kufungiwa kutokana na kutokidhi vigezo.

Halikadhalika wilayani Musoma wananchi wameendelea kupata adha ya usafiri baada ya nauli kupanda kutoka Sh2,000 hadi Sh5, 000 kutoka mjini hadi Bweri kwa pikipiki.

Meneja wa TRA wa mkoa, Ernest Nkang’aza ameonya watakaokwenda nchi jirani kujaza mafuta kuwa watachukuliwa hatua kwa kuwa watu wa uhamiaji wanawafuatilia.

“Vituo vyote vitaendelea kufungwa hadi pale wamiliki watakapofunga mashine hizo,” alisema Nkang’aza.

Tatizo hilo la mafuta pia limeugusa mkoa wa Tabora ambako vituo 21 vimefungwa katika wilaya za Tabora Mjini vituo vinne, Igunga vinne Urambo na Nzega vituo vitano huku fungiafungia hiyo ikihamia wilaya za Sikonge na Kaliua.

Akizungumzia suala hilo, meneja wa mkoa, Leonard Shija alisema kazi hiyo si ya kushtukiza kwa kuwa wamiliki walipewa muda wa kutosha, hivyo watahakikisha vituo vyote visivyotekeleza agizo hilo, vinafungiwa.

Katika Mkoa wa Kagera, vituo sita wilayani Bukoba vimefungwa huku meneja wa mkoa, Adam Ntoga akisema wamiliki wameshindwa kutimiza wajibu wao kwani walipewa muda tangu Septemba mwaka jana.

Baadhi ya watumiaji wa vyombo vya moto , hasa bodaboda, walisema kufungiwa kwa vituo hivyo kumewaathiri kwa kuwa wamelazimika kufuata mafuta Kyaka na Kihanga kwa watu binafsi huku bei yake ikipanda kutoka Sh2,400 hadi Sh 4,000 kwa lita.

Nyongeza na Elizabeth Edward