Njombe sekondari yalalama kushika mkia matokeo kidato cha sita

Mkuu wa shule ya sekondari Njombe {NJOSS } Benard William

Ikiwa ni siku tatu tangu kutangazwa kwa matokeo ya kidato cha sita, Shule ya Sekondari ya Njombe imelilalamikia Baraza la Mitihani la Tanzania (Necta) ikidai matokeo hayo hayaendani na wastani wake wa ufaulu (GPA) wa masomo.

Hata hivyo, Dk Joseph Mbowe, ambaye ni mkuu wa Idara ya Teknolojia, Habari na Mawasiliano (Tehama) wa Necta, amekanusha madai hayo akisema matokeo hayana tatizo lolote isipokuwa ufaulu wa masomo kwa GPA haujapishana sana.

Kwa mujibu wa matokeo yaliyotangazwa na Necta Jumamosi mjini Zanzibar, shule 10 zilizofanya vibaya, Njombe imeshika nafasi ya nne kutoka mkiani. Orodha hiyo inajumuisha shule za Chasasa iliyoko Pemba, Kiembesamaki (Unguja), Mwenyeheri Anuarite (Dar es Salaam), Ben Bella (Unguja), Meta na Mlima Mbeya (Mbeya), Njombe (Njombe), Al-Ihsan Girls (Unguja), St Vincent (Tabora) na Hagafilo (Njombe).

Mkuu wa Shule ya Sekondari ya Njombe, Bernard William alisema hawakubaliani na matokeo hayo kwa sababu kuna baadhi ya shule wamezipita kwa kutoa daraja la kwanza, nafasi ya masomo na ufaulu wa masomo kwa GPA.

Alisema kulinganisha na matokeo ya shule nyingine ambazo wanaona wamezizidi kwa kiwango cha ufaulu, wanashangazwa kuwa nafasi ya 442 kati ya shule 449 zilizofanya mtihani wa taifa.

“Tunaomba kitengo cha Tehama cha Necta wapitie upya kwa kuwa matokeo hayaendani na ufaulu wa masomo kwa GPA,” alisema William.

Akizungumzia suala hilo, Dk Mbowe alisema mwaka huu wameangalia vigezo mbalimbali, kama wanafunzi kupata alama “A” katika viwango vyao vya ufaulu shuleni.

Hata hivyo, Mbowe alisema: “Nimewasiliana na mkuu wa shule na suala lake Necta tunalifanyia kazi. Lakini katika shule yake tumebaini kuna changamoto ya mwanafunzi wa kiume kuandikwa katika jinsi ya kike na hilo ni kigezo kimojawapo tulichokiangalia,” alisema Dk Mbowe.

Alisema kosa hilo lilifanyika tangu matokeo ya kidato cha nne na mwanafunzi huyo aliomba marekebisho yafanyike.

Hata hivyo, alisema bado katika matokeo ya kidato cha sita jina lake limeendelea kutokea kwenye orodha ya wanafunzi wa kike, akilenga kuonyesha jinsi shule hiyo ilivyofanya uzembe kushughulikia tatizo hilo.