Naibu Spika awataka wabunge watimize ahadi kwa wananchi

Naibu Spika wa Bunge la Tanzania, Dk. Tulia Ackson amewataka wabunge wa viti maalum kutekeleza kwa vitendo ahadi walizozitoa kwa wananchi wakati wakipigiwa kura badala ya kuwatelekeza kwa kisingizio cha kutokuwa na majimbo.
 

Akiendesha harambee ya kuendeleza mfuko wa uwezeshaji kiuchumi kwa wanawake ambao ni wana-CCM wa mkoa wa Songwe ulioanzishwa  na Mbunge wa Viti Maalumu, Juliana Shonza, Naibu Spika alisema zimepatikana Sh35 milioni.

Katika harambee hiyo, Shonza alitoa Sh20 milioni ikiwa ni ahadi ya kuwapatia mtaji wa Sh200,000 kila kikundi cha wanawake hao ambao wameanzisha mradi wa ujasiriamali huku wadau waliofika kuunga mkono jitihada za mbunge huyo kuwainua wanawake wa mkoa wakichangia Sh15 milioni.

Dk. Tulia amesema wapo wabunge ambao hawatekelezi kwa vitendo waliyoahidi wananchi wao kwenye eneo husika na kibaya zaidi akijitokeza mtu mwingine na kutekeleza yaliyoahidiwa wakati wa kampeni, mbunge wa eneo hilo hukasirika.

“Shonza asante sana kwa somo hili na kwa kiasi hiki cha Sh35 milioni kila kikundi kitapata Sh320,000 badala ya Sh200,000 ulizoahidi. Hivyo basi niwaombe sana wabunge hasa wa CCM kuiga mfano mzuri wa hiki tunachoshuhudia leo hii kutoka kwa Mbunge Shonza kwa kutekeleza ahadi alizozitoa kwa wananchi wakati wa kupigiwa kura lakini pia kwa kutekeleza ilani ya CCM,” amesema Dk. Tulia.

Shonza (CCM) amesema baada ya kupewa ridhaa  kuwa mbunge,  alianza kukutana na wanawake wa mkoa huo kwa ajili ya kuwahamasisha kujiunga katika vikundi  vya kiujasiriamali na alivisimamia hadi vikapata usajili na kuwapa elimu ya ujasiriamali ili waweze kuanzisha mradi wowote utakaowawezesha kujikopesha wenyewe.

 “Mkoa mzima una kata 100 na kila kata ina kikundi nilichokianzisha na vikundi hivi kupata   usajili ambao niliusimamia mimi niliwaahidi kuwapatia mtaji wa  Sh200,000 kwa kila kikundi waweze kuanzisha mradi wowote wa ujasiriamali na vingine nashukuru vimeanza kazi za ujasiriamali na vinafanya kazi, lakini nikaona niwashirikishe wabunge wenzangu wa maeneo mengine na wadau wengine watakaoniunga mkono kwenye hili na nashukuru mmeonesha ukweli wenu”.

Alisema wanawake wa Songwe hawahitaji kutafutiwa kazi maofisini ama shughuli ya kufanya, kwani   ni wachapakazi lakini changamoto waliyo nayo ni mitaji tu kwani uwezo wa kuingia shamba na kuanzisha mradi wowote wa kiujasiriamali wanao.

Katika uzinduzi, huo, Mbunge Shonza aliungwa mkono na wabunge mbalimbali akiwamo Mbunge wa Jimbo la Mtama, Livingstone Lusinde ‘Kibajaji’, Mbunge wa Jimbo la Pangani Tanga, Jumaa Awesu, Janeth Mbene wa Ileje na Josephat Hasunga wa wa Jimbo la Vwawa Mbozi.

Mbunge wa  Jimbo la Mtama, Livingstone Lusinde ‘Kibajaji’ ambaye alikuwa mshereheshaji ‘MC’  wa shughuli hiyo, aliwaambia wana-CCM kwamba kitendo cha kujenga  dhana ya kupata mbunge mpya kwa kila kipindi kinasababisha kila mbunge anayeingia madarakani kuwa na mashaka  hivyo kuamua kuitumia nafasi hiyo kujijenga mwenyewe na familia yake na kuwasahau wapiga kura kwani anakuwa hana uhakika wa kuendelea kuchaguliwa. 

Amesema: “Wabunge hawa mnaowaona hapa wanahitaji malezi kutoka kwenu wana-CCM na malezi yenyewe ni kuungwa mkono ili aweze kuwatumikia zaidi nyinyi badala ya kujinufaisha yeye kwani anakuwa na uhakika zaidi, ngoja niwaambie mimi ni  mbunge kwa kipindi cha pili na kipindi cha tatu nitakuwa mimi kwa sababu ninaungwa mkono na wananchi.”

Mbunge wa Jimbo la Ileje Mkoa wa Songwe, Janneth Mbene aliwataka wanawake hao kuhakikisha fedha hizo wanazitumia kwa malengo yaliyokusudiwa pindi wanapokopa huku wakikumbuka kurejesha mikono kwa ajili ya kuendeleza miradi yao.