Mwakyembe awabeba Wanahabari kuipokea Everton

Waziri wa Habari, Sanaa, Utamaduni na Michezo, Dk Harrison Mwakyembe alijikuta kwenye wakati mgumu kwa muda wakati akiandamwa na waandishi wa habari Uwanja wa Ndege alipokuwa akikipokea kikosi cha Everton.

Waziri Mwakyembe alikumbana na kadhia hiyo mara baada ya kufika uwanja wa Ndege wa JNIA saa 2:42 na kuvamiwa na kundi la Wanahabari ambao walitaka atumie cheo chake kuwaruhusu wafanye kazi zao kwa  uhuru.

Awali waandishi wa habari walizuiwa kuingia Uwanja wa Ndege upande wa VIP ambako Everton ilikoshukia kwa ajili ya kuchukua matukio, ndipo walipoamua 'kumvaa' Waziri Mwakyembe ambaye alikuwa katika gari yake na kupaza sauti wakimshinikiza awatete huku wakiimba kwamba wana imani na waziri huyo.

"Waziri huyo wa Michezo aliwasikiliza na kuwatuliza kwa kuwambia yeye ndiye mwenye nchi kwa tukio lile hivyo lazima achukue nafasi yake kwa kuwatetea wanahabari zoezi ambalo lilichukua zaidi ya dakika 10 ndipo waandishi wakaruhusiwa kuingia kutekeleza majukumu yao.

"Mtakapoingi mwisho wenu ni pale kwenye lile ua," alisema Mwakyembe huku akionyesha umbali ambapo Wanahabari wanapaswa kuishia na kuendelea.

"Mtakaporuhusiwa na kukiuka masharti ya humu ndani, kuna leo na kesho ikitokea mmezuiliwa wala sitoingilia kati," alisema Waziri huyo.