Mbarawa asema Serikali ina wajibu wa kuboresha bandari

Waziri wa Ujenzi, Uchukuzi na Mawasiliano, Profesa Makame Mbarawa amesema Serikali ina wajibu wa kuboresha mandhari ya bandari na huduma zake ili kuendelea kuwa msaada kwa nchi nyingine ambazo hutumia bandari hiyo.

Profesa Mbarawa amesema hayo leo Alhamisi Julai 13 wakati wa hafla ya kusaini mkataba wa makubaliano baina ya Serikali ya Tanzania na Uganda. Mkataba huo unalenga kuboresha huduma za bandari, usafiri wa maji na reli.

“Tanzania tunao wajibu wa kuhakikisha upatikanaji wa huduma za bandari zilizo bora kwa wateja wetu ambao ni nchi zinazotuzunguka. Kupitia mkataba huu ubora wa huduma za usafirishaji wa mizigo utaongezeka sambamba na ukuaji wa biashara,” amesema Profesa Mbarawa.

Kwa upande wake Waziri wa Uchukuzi wa Uganda, Bagiire Aggrey ambaye ndiye aliyesaini mkataba huo kwa niaba ya Serikali yake amesema nchi yake imekuwa ikipendelea zaidi kutumia bandari ya Dar es Salaam kutokana na gharama zake kuwa ndogo.

“Nchi zetu zinapaswa kushirikiana katika maendeleo ya nyanja za usafirishaji. Ni lazima tuiendeleze kwa pamoja kwaaji ya maendeleo ya baadaye,”amesema Aggrey.