Kenya, Tanzania zamaliza mgogoro gesi ya kupikia

Siku chache baada ya Chama cha Wafanyabiashara wa Gesi ya Kupikia (LPG) Tanzania kulalamikia uamuzi wa Kenya kuwafungia kuuza bidhaa hiyo nchini humo, mazungumzo yamefanyika na zuio hilo kuondolewa.

Mazungumzo hayo yamefanyika baada ya uhusiano wa kibiashara baina nchi hizo kuonyesha dalili ya kuzorota kwa siku za karibuni na kusababisha kuzuiwa kwa baadhi ya bidhaa kusafirishwa katika mataifa haya jirani.

Taarifa zilizoripotiwa jana na gazeti la Daily Nation la Kenya zilimnukuu Waziri wa Mambo ya Nje na Ushirikiano wa Afrika Mashariki, Balozi Augustine Mahiga akisema mambo yapo sawa.

“Mazungumzo ya Rais John Magufuli na Uhuru Kenyatta yameleta matokeo chanya,” alikaririwa Balozi Mahiga.

Kutokana na makubaliano ya wakuu hao, Kenya sasa itaruhusu uingizaji wa unga wa ngano na gesi iliyokuwa imezuiwa huku Tanzania ikitoa fursa kwa matairi ya magari, maziwa na sigara kuingia nchini.

Licha ya hayo, kamati ya kushughulikia kero mbalimbali za kibiashara baina ya mataifa haya imeundwa ili kuyapatia ufumbuzi.

Julai 19, chama cha wafanyabishara wa gesi (Tanzania LPG Association), kilitoa taarifa kulalamikia zuio la Kenya kuingiza bidhaa hiyo kwa barabara na kuzitaka serikali husika kuchukua hatua kurekebisha hali hiyo.

Taarifa hiyo iliyotolewa na wajumbe watatu; Mohamed Mohammed, Rajesh Chidambaram na Hamisi Ramadhan imesema marufuku hiyo ingeleta athari kwenye mtaji waliowekeza kwa kuzingatia kuwa Kenya hununua tani 40,000 za ujazo za gesi hiyo kati ya tani 100,000 zinazoingizwa nchini kila mwaka hivyo, muafaka uliofikiwa uterejesha biashara iliyodumu kwa zaidi ya miaka 10.

Wakati inazuia, Kenya ilisema gesi kutoka Tanzania inafungwa kiholela kwenye vituo vilivyomo nchini humo pamoja na wafanyabiashara wake kutotoa taarifa sahihi hivyo kutaka gesi yote kuingilia Bandari ya Mombasa ambako uratibu utafanywa.