Kasesela awasuta wanaume wanaowakimbia watoto walemavu

Mkuu wa Wilaya ya Iringa, Richard Kasesela amewataka wanaume kuacha tabia ya kuwakimbia watoto wao, pale wanapobaini kuwa na ulemavu.

Kasesela amesema familia nyingi zenye watoto walemavu zinalelewa na wanawake peke yao, baada ya waume kuona hawastahili kuwalea watoto hao kutokana na unyanyapaa.

Akizungumza jana jioni baada ya kuwatembelea watoto wenye ulemavu wanaolelewa kwenye kituo cha Nyumba Ali cha Wilolesi, Iringa Mjini, Kasesela amesema watoto wenye ulemavu wana haki ya kupendwa na kutunzwa na wazazi wote wawili.

“Nasikitishwa na wanaume wanaowatelekeza watoto wao kisa ulemavu? Kwanini muwakimbie watoto wenu kisa ulemavu? Hawa ni watoto kama walivyo wengine na wakipewa haki zao wanaweza kufanikiwa. Msiwaachie wanawake mzigo huu wa malezi,” amesema.

Amewaagiza maofisa tarafa kwenye wilaya hiyo kufanya utafiti nyumba hadi nyumba ili kubaini kama kuna watoto wenye ulemavu waliofungiwa ndani ili wasaidiwe.

Mbunge wa Viti Maalum Mkoani Iringa, Ritha Kabati amesema watoto wenye ulemavu wanaposaidiwa kutengeneza msingi wa maisha yao, wanaandaliwa mazingira mazuri ya kujitegemea wanapokuwa watu wazima.

“Tusipowekeza kwa hawa watoto maana yake tunaandaa omba omba, wote tumeshuhudia baadhi ya walemavu wakifanya vizuri lakini hadi, kuwe na mtu wa kuwashika mkono. Hili ni jukumu letu,” amesema.

Awali, Mratibu wa kituo hicho, Adam Duma alisema walikianzisha kwa lengo la kuwakusanya na kuwasaidia watoto wenye ulemavu waliokuwa wamefungiwa nyumbani kwa kukosa msaada.

Amesema pia kituo hicho kililenga kuwakusanya wazazi na kuwaelekeza namna ya kuwalea watoto wao wenye ulemavu ili hatimaye wafikie ndoto zao za kimaisha, ikiwamo kupata elimu.

“Tumefanikiwa kuwakutanisha wazazi ambao wameweza kuwa na sauti moja katika kubainisha na kusaidiana katika kutatua changamoto mbalimbali zinazoikumba jamii ya watoto waishio na ulemavu,” alisema kiongozi huyo.

Amesema kuwa wamefanikiwa kuwa na vituo viwili vya watoto wenye ulemavu na kwamba kila kituo kina watoto 35.

“Majukumu yetu mengine ni kuwafanyia watoto hao mazoezi ya viungo kwa sababu wapo wanaopata ahueni na wengine kurejea kwenye hali ya kawaida, kutokana na mazoezi hayo,” amesema.

“Kituo hiki kwa msaada wa wahisani mbalimbali na mahitaji makubwa ni chakula, baiskeli za walemavu pamoja na gharama za uendeshaji,” ameongeza.