DC Mbulu apiga marufuku uchimbaji dhahabu

Mkuu wa Wilaya ya Mbulu Mkoani Manyara, Chelestino Mofuga, amepiga marufuku uchimbaji wa madini ya dhahabu kwenye machimbo ya Haydom hadi hapo mwekezaji atakapokamilisha mkataba na Halmashauri ya wilaya hiyo.

Pia, Mofuga ameagiza kukamatwa kwa mmiliki na dereva wa lori la tani 10 lililokutwa limebeba mchanga wa dhahabu (makinikia) kutoka machimbo ya Haydom likipeleka mkoani Singida kuchenjua.

Akizungumza jana (Alhamisi Julai 6) kwenye machimbo hayo amesema aliamua kufanya ukaguzi wa kushtukiza kwenye machimbo ya dhahabu ya Haydom na kukuta lori la tani 10 likiwa na mchanga unaopelekwa mkoani Singida.

Amesema alipata taarifa kuwa lori hilo lilishabeba mchanga huo zaidi ya mara sita kabla ya kukamatwa na kuamuru kusitisha kwa zoezi hilo la kwenda kuchenjua dhahabu hiyo mkoani Singida badala ya Haydom.

“Nimeagiza mmiliki na dereva wa lori hilo lenye namba za usajili T662 AWT, mali ya Mohamad Ally mkazi wa jijini Arusha kushikiliwa kwenye kituo cha polisi Haydom hadi uchunguzi ufanyike,” amesema Mofuga.

Amesema ametoa amri ya kusitishwa kwa uchimbaji wa dhahabu kwenye eneo hilo hadi mwekezaji atakapokamilisha mikataba na mkurugenzi mtendaji wa halmashauri hiyo, Hudson Kamoga.

Baaadhi ya wananchi wa eneo hilo, walipongeza hatua ya mkuu huyo wa wilaya kuchukua hatua hiyo kwani baadhi ya watu wanaojiita wawekezaji wamekuwa wanapora hovyo hovyo rasilimali za nchi.

Mkazi wa Haydom, Raymond Sulle amesema walishangazwa na kitendo cha mwekezaji huyo aliyekuwa anabeba mchanga huo wa dhahabu na kuondoka nao hadi Singida kuchenjua badala ya Haydom.

“Baada ya tukio hio tulitoa taarifa mara moja kwa mkuu wetu wa wilaya, ambaye naye hakuchukua muda mrefu akafika kwenye eneo hilo na kuagiza zoezi hilo lisimame mara moja,” amesema Sulle.