Bashe naye atishiwa kupotezwa

Mbunge wa jimbo la Nzega Mjini kupitia tiketi ya CCM, Hussein Mohamed Bashe amesema ametumiwa ujumbe wa vitisho kuwa yeye ni miongoni mwa watu 11 waliopo hatarini kufanyiwa vitu vibaya popote pale watakapoonekana ikiwemo kuundiwa ajali.

Hussein Bashe Bungeni

Bashe amebainisha hayo leo wakati akiomba muongozo Bungeni ambapo alitaka Bunge liahirishe shughuli zake ili kujadili matukio hayo ya utekaji ikiwa ni pamoja na vitisho hivyo na kubainisha kuwa kuna wabunge wengine akiwemo Mbunge wa Geita Joseph Kasheku Musukuma, ambao wamo kwenye orodha ya watu wanaowindwa.

Katika maelezo yake Bashe amesisitiza kuwa Bunge na Serikali haviwezi kulifumbia macho jambo hilo haramu ambalo kwa sasa imekuwa gumzo katika midomo ya watu masuala ya utekaji watu na kuwapeleka kusipojulikana.

"Kuna watu wamenitumia ujumbe kwamba mimi ni kati ya watu 11 waliopo hatarini kufanyiwa vitu vibaya popote pale tulipo. Bunge na Serikali haviwezi kulifumbia macho jambo hili la haramu wakati Watanzania wanatekwa na watu wasiojulikana". Ameandika Mbunge huyo kupitia ukurasa wake wa twitter

Aidha Bashe amesema kuwa kikundi  kinachohusika na matukio ya utekaji kiko ndani ya Idara ya Usalama wa Taifa na kwamba hao ndiyo waliohusika na tukio la kumteka msanii Roma Mkatoliki.

Roma Mkatoliki

Kwa upande mwingine Mbunge wa Kigoma mjini, Zitto Kabwe amempa pole mwenzake na kumtaka amtumainie Mungu kwa kuwa ndiye anayejua mwisho wetu.

"Allah ndiye anajua mwisho wetu wote. Hao wanaotuwinda watajikuta ndiyo wanawindwa na mola. Tusiogope. Tupambane". Ameandika Zitto

Wakati huo huo, Mbunge wa Mbeya Mjini Joseph Mbilinyi 'Sugu' pia aliomba muongozo kwa spika kukazia hoja ya Bashe akitaka Bunge liahirishwe, huku akimtaka pia Waziri wa Mambo ya Ndani Mh. Mwigulu Nchemba kuachia ngazi kwa kuwa ameshindwa kuwahakikishia wananchi usalama wao.

Hata hivyo Naibu Spika Dkt. Tulia Ackson akijibu muongozo huo, alisema kwa mujibu wa kanuni, jambo hilo halijakidhi vigezo vya kufanya shughuli za Bunge liahirishwe