SAGCOT watakiwa kusambaza huduma ili kuongeza tija

 

Dodoma. Naibu Katibu Mkuu Wizara ya Viwanda, Biashara na Uwekezaji, Mhandisi Joel Malongo, amekishauri Kituo cha Kuendeleza Kilimo Kusini mwa Tanzania (SAGCOT) kusambaza huduma zake katika maeneo mengine ya nchi ili kuongeza elimu na tija kwa wakulima nchini.

Akizungumza  katika mkutano wa kazi uliolenga kufahamiana baina ya wadau wa masuala ya kilimo kutoka sekta ya umma na binafsi kilichofanyika Dodoma hivi karibuni, Mhandisi Malongo amesema:

“Ukanda huu wa SAGCOT unazalisha asilimia 65 ya chakula cha nchi, maana yake ipo haja ya kuhamasisha uwekezaji zaidi ili malighafi kama nyanya, viazi na bidhaa za maziwa zisisafirishwe nje ya nchi zikiwa ghafi.” Amesema na kuongeza;

“Ikiwa Ukanda wa Nyanda za Juu Kusini umefanikiwa kufanya maajabu haya katika kilimo, maana yake maeneo mengine ya nchi yanahitaji kuendelezwa pia kwa ajili ya kufikia malengo ya Tanzania ya viwanda.”

Mhandisi Malongo amesema upande wa Mashariki ya nchi kuna uzalishaji wa katani, hiliki na mazao mengine ya biashara na kusema kuwa hili litasaidia kuangalia uwezekano wa kuendeleza mazao yasiyo ya chakula.

Mhandisi  Malongo amesema upande wa Kaskazini  kuna wazalishaji wazuri wa pamba. 

‘Sasa hivi nchi za Afrika Mashariki zimepiga marufuku kuingiza mitumba ya nguo na viatu. Ipo haja kuvijengea uwezo viwanda vyetu vipate pamba nyingi kwa ajili ya mavazi kwani viwanda vya nguo vinazalisha ajira nyingi. Ile ndoto yetu ya kuwa na asilimia 40 ya ajira katika viwanda itimie.” Amesema

Naibu Katibu Mkuu huyo amesema, hali ya hewa katika mikoa ya Nyanda za Juu Kusini ni nzuri kwa ufugaji hivyo ipo haja ya kutengeneza viwanda vingi kwa ajili ya mazao ya maziwa na kusisitiza kuongeza viwanda katika maeneo mengi ya nchi.

“Mwezi uliopita Rais John Magufuli alizindua kiwanda cha matrekta cha Ursus mkoani Pwani, tumepanga kuyauza kwa bei nafuu ili yawafikie wakulima. Natoa rai kwa watu wa SAGCOT, Benki ya Maendeleo ya Kilimo na NDC waangalie namna ya kusambaza matrekta haya kwa wakulima ili msimu ujao mavuno yaongezeke,” amesema Mhandisi Malongo.

Naye, Mkurugenzi Mtendaji wa SAGCOT, Geoffrey Kirenga amesema kikao kimezingatia umuhimu wa kiasi cha bidhaa kinachohitajika. Mfano kiwanda cha kusindika nyanya kinakosa nyanya za kutosha na matokeo yake wanaagiza kutoka nje.

“Hii changamoto lakini pia ni fursa kwa wakulima kuongeza uzalishaji, kutokana na uwekezaji uliofanyika katika maeneo hayo naomba wakulima wachangamkie.” Amesema.

Ametoa  mfano wa Kiwanda cha Silver Land kilichopo  Iringa kinachozalisha chakula cha mifugo na kusema kiwanda hicho kinachakata tani 40 kwa saa lakini hakipati kiasi cha kutosha cha soya na mahindi. Kwa hiyo kinalazimika kuagiza kutoka nje ya nchi.

Kirenga amewataka  wazawa wanaofanya kazi katika viwanda vya wawekezaji wa nje watumie fursa hiyo kujifunza ili waanzishe viwanda vyao baadaye.

“Wenye viwanda wa kesho watatokana na wafanyakazi wanaofanya kwenye viwanda vya wageni, pale tunapanda mbegu za wenye viwanda wa baadaye. Wanapofanya kazi wasiangalie mshahara tu bali mafunzo wajiongeze kazi iwe darasa lao, kwa sababu viwanda vitakavyotengenezwa si lazima viwe vikubwa hata katika mataifa yaliyoendelea walianza kwa viwanda vidogo lakini leo ndio wenye viwanda vikubwa,” amesema  Kirenga.

Miongoni mwa wahisani wa shughuli zinazoendeshwa na SAGCOT katika Nyanda za Juu Kusini ni pamoja na Serikali ya Tanzania, UKAID, USAID, Benki ya Dunia, Ubalozi wa Norway, UNDP na AGRA.