Viongozi wa mashirika ya umma, binafsi watakiwa kupima afya

 

Dar es Salaam. Viongozi wa mashirika ya Umma na Binafsi wametakiwa kujenga mazoea ya kupima afya zao mara kwa mara ili endapo watabainika kuwa na magonjwa, wapate matibabu mapema.

Rai hiyo imetolewa leo Ijumaa na Mkurugenzi Mtendaji wa Taasisi ya Moyo Jakaya Kikwete (JKCI), Profesa Mohamed Janabi wakati akiongea na viongozi wa Shirika la Nyumba la Taifa (NHC) waliofika katika Taasisi hiyo kwa ajili ya upimaji wa afya zao.

Profesa Janabi amesema baadhi ya viongozi hawana mazoea ya kupima afya zao japo mara moja kwa mwaka na inapotokea wamegundulika  kuwa na tatizo  la ugonjwa huwa ni  kubwa na limeshaleta madhara mwilini.

 “Wanapokuja kugundua tatizo, wakati  mwingine huwa  ni vigumu kutibika, lakini  tatizo kama hilo likigundulika  mapema katika hatua ya awali  huwa ni  rahisi kutibika,” amesema.

Akizungumzia kuhusu magonjwa ya moyo Profesa Janabi amesema ni muhimu mgonjwa afuate maelekezo ya jinsi ya kutumia dawa aliyopewa na daktari wake kwani kuna baadhi ya wagonjwa wamekuwa na tabia ya kuacha kutumia dawa pindi wanapojiona wamepata naafuu jambo ambalo siyo sahihi.

Akielezea jinsi ya kujikinga na magonjwa ya moyo kwa upande wa chakula Ofisa Lishe kutoka JKCI, Louisa Shem amesema ni muhimu kupunguza utumiaji wa vyakula vya mafuta kupita kiasi hasa mafuta yatokanayo na wanyama na kutumia vyakula vya nafaka zisizokobolewa.

“Kupunguza unywaji wa pombe na uvutaji wa bidhaa zitokanazo na tumbaku ikiwamo sigara, kufanya mazoezi ya mwili angalau nusu saa kwa siku na kupunguza matumizi ya vyakula vyenye chumvi nyingi,” amesema.

Kwa upande wake Mkuu wa Idara ya Afya na Usalama Kazini kutoka  Shirika la Nyumba la NHC, Dk Yothan Mackenzie  amesema hivi karibuni walikuwa na mkutano wa baraza la wafanyakazi katika mkutano huo kulikuwa na mada ya ulaji na afya wakaona ni vyema mada hiyo iende sambamba na upimaji wa magonjwa mbalimbali ikiwamo ugonjwa wa moyo.

Dk Mackenzie amesema wanawapima viongozi hao kwa awamu hadi sasa jumla ya wakurugenzi na wakuu wa vitengo 14 wamepima na kujua afya zao na viongozi wengine wataendelea kupima kwani shirika lao linaamini kuwa mfanyakazi akiwa na afya njema ataweza kufanya kazi zake vizuri.

Baadhi ya magonjwa waliyopima viongozi hao ni pamoja na  moyo, tezi dume, figo na sukari.