CHADEMA NJOMBE KUTOFANYA KAZI NA DC ALIYEMTANDIKA MAKOFI MWENYEKITI WA MTAA.

Mwenyekiti chadema wilaya ya njombe abu mtamike akizungumza na wananchi katika kampeni za uchaguzi mkuu mwaka 2015

Kufuatia malalamiko yaliyotolewa na mwenyekiti wa mtaa wa buguruni Mjini Njombe Emanuel Ngelime kuhusu kupigwa vibao  mkuu wa wilaya ya Njombe bi Ruth Msafiri ,Chama Cha Demokrasia na Maendeleo CHADEMA  Jimbo la Njombe kimetangaza rasmi kutokufanya kazi na mkuu huyo kuanzia sasa.

Tamko hilo linaambatana na kumtaka mkuu huyo kumuomba radhi mwenyekiti huyo ambaye anahudumu katika serikali ya mtaa kwa tiketi ya chadema ndani ya siku saba kuanzia leo march 7,2017.

Chama hicho kinasema kamwe hakiwezi kufanya kazi na kiongozi ambaye anatumia nafasi yake tofauti na sheria ikiwemo nguvu za mabavu na lugha za kejeli kwa wenyeviti wa serikali za mitaa.

Mwenyekiti wa chadema wilaya ya Njombe Abuu Mtamike amesema jambo hilo halivumiliki anachotakiwa ni kuomba radhi ili kuendelea kuaminiwa na wananchi anaowaongoza.

Mtamike ameongeza kuwa  kinachoonekana mkuu huyo anafanya kazi ya siasa na kuacha majukumu yake na kwamba nia ya mkuu huyo ni kudhoofisha vyama vya upinzani mjini Njombe na hasa Chadema.

Kwa Upande wake Mwenyekiti wa madiwani wa chadema jimbo la Njombe Mjini George Sanga kwa nafasi yake anasema pia kama madiwani nao hawako tayari kutoa ushirkiano  wowote kwa mkuu huyo hadi pale aatakapo omba radhi ka kitendo alichofanya.

Naye mwenyekiti wa wenyeviti wa serikali za mitaa zinazoongozwa na chadema Brayson Nickodemas Mgaya anasema mara kadhaa mkuu huyo wa wilaya amekuwa akitembelea katika mitaa mbalimbali na kufanya shughuli za ukaguzi wa miradi na hasa mashuleni bila kuwashirikisha wenyeviti wa mitaa husika.

February 28 mwaka huu Mkuu wa Wilaya ya Njombe Bi Ruth Msafiri  alidaiwa kimtandika makofi Mwenyekiti wa Mtaa wa Buguruni –Matalawe  Emmanuel Ngelime mara baada ya kutokuwepo kwa maelewano baina ya viongozi hao wawili.

Hata hivyo Siku Moja Baadaye Mkuu huyo wa Wilaya alikanusha taarifa za kuhusika kumtandika vibao mwenyekiti huyo jambo lililoongeza Gumzo kwa wanachi hususani wananchama wa CHADEMA.